Prezident İlham Əliyev Polşa Prezidenti Karol Navrotskiyə məktub ünvanlayıb.

“Qafqazinfo” xəbər verir ki, məktubda deyilir:

“Hörmətli cənab Prezident.

Krakov şəhərində törədilmiş qanlı hadisə nəticəsində həlak olanlar və yaralananlar barədə xəbər bizi olduqca kədərləndirdi.

Baş vermiş faciə ilə əlaqədar Sizə, həlak olanların ailələrinə və yaxınlarına, bütün Polşa xalqına öz adımdan və Azərbaycan xalqı adından dərin hüznlə başsağlığı verir, xəsarət alanların tezliklə sağalmasını arzulayıram”.

Qubada ölümlə nəticələnən qəza olub.

“Qafqazinfo”nun məlumatına görə, hadisə rayonun Tüləkəran kəndi ərazisində qeydə alınıb.

Belə ki, “Lada-Niva” markalı avtomobilin sürücüsü hətəkətdə olarkən idarəetməni itirib, nəticədə avtomobil yol kənarındakı dərəyə aşıb.

Hadisə zamanı sürücü və iki sərnişin müxtəlif dərəcəli bədən xəsarətləri alaraq xəstəxanaya aparılıblar.

Sərnişinlərdən biri xəstəxanaya aparılarkən yolda ölüb.

Faktla bağlı araşdırma aparılır.

***

Qubada baş verən qəza zamanı ölən və xəsarət alanların kimliyi məlum olub.

Belə ki, Yuxarı Tüləkəran kənd sakini, 1995-ci il təvəllüdlü Nurəli Əlirzayevin idarə etdiyi “Lada Niva” markalı avtomobil aşıb.

Qəza nəticəsində avtomobildə olan sərnişin, 2003-cü il təvəllüdlü Fəqan Ədilov aldığı xəsarətlərdən xəstəxanaya aparılarkən yolda vəfat edib.

Sürücü Nurəli Əlirzayev və digər sərnişin, 2005-ci il təvəllüdlü Nuray Ədilova müxtəlif dərəcəli bədən xəsarətləri alıblar.

Faktla bağlı araşdırma aparılır.

Mübariz Muradov

Kanada hökuməti Rusiyanın müdafiə sənayesini, ballistik raket texnologiyalarının inkişafını və kiberəməliyyatlarını hədəf alan yeni sanksiyalar paketini qəbul edib.

“Qafqazinfo” xəbər verir ki, Kanada Xarici İşlər Nazirliyinin yaydığı məlumata görə, nazir Anita Anand Parisdə keçirilən G7 Xarici İşlər Nazirlərinin Görüşü çərçivəsində bu barədə ətraflı məlumat paylaşıb.

Yeni məhdudiyyətlər siyahısına ümumilikdə 38 qurum və 24 fiziki şəxs daxil edilib.

Qeyd olunub ki, sanksiya siyahısındakı subyektlər Rusiyanın hərbi imkanlarının gücləndirilməsində, ballistik raketlərin hazırlanmasında və kiberfəaliyyətlərdə birbaşa rolu olan aktorlardır. Yeni məhdudiyyətlər həmçinin maliyyə sektorunu, o cümlədən kriptovalyuta birjalarını əhatə edərək Moskvanın Ukraynadakı müharibəni maliyyələşdirmək imkanlarını məhdudlaşdırmağı və iqtisadi xərcləri artırmağı hədəfləyir.

Anita Anand qeyd edib ki, tətbiq edilən tədbirlər Rusiya Prezidenti Vladimir Putinin Ukrayna şəhərlərini raketlərlə hədəf almaq qabiliyyətini zəiflətmək məqsədi daşıyır. Ukraynaya qətiyyətli dəstəyin davam edəcəyini vurğulayan nazir Rusiyanın hərbi təcavüzünə son qoyulana və Ukraynanın ərazi bütövlüyü bərpa olunana qədər sanksiya təzyiqlərinin artırılaraq davam etdiriləcəyini bəyan edib.

İran rəsmiləri 8 milyard dollarlıq dondurulmuş aktivlərin azad edilməsi müqabilində Hörmüz boğazının dəniz nəqliyyatına açılması barədə yayılan iddiaların həqiqəti əks etdirmədiyini bildiriblər. Tehran administrasiyası yalnız irəli sürdükləri şərtlərin yerinə yetiriləcəyi təqdirdə danışıqları qəbul edəcəklərini vurğulayıb.

“Qafqazinfo”nun xəbərinə görə, “Fars” xəbər agentliyinə açıqlama verən və adı açıqlanmayan rəsmi şəxs səkkiz milyard dollar müqabilində boğazın yenidən açılması istiqamətində hər hansı danışıqların aparıldığını qəti şəkildə təkzib edib.

Bununla belə, bəzi beynəlxalq KİV-lər, o cümlədən İsrailin “Israel Hayom” qəzeti ABŞ Prezidenti Donald Trampın Qətərin Baş naziri Məhəmməd bin Əbdürrəhman Əl-Tani ilə İranın təkliflərini müzakirə etmək üçün görüşəcəyini iddia etmişdi.

Tehran rəhbərliyi Vaşinqtona qarşı irəli sürdüyü tələblərdə qətiyyətli olduğunu bildirib. Belə ki, İranın əsas tələblərinə dəniz blokadasının tamamilə qaldırılması, ticarət və neft tankerlərinin Hörmüz boğazından təhlükəsiz keçməsi üçün rəsmi zəmanətlər, birtərəfli sanksiyaların ləğv edilməsi, neft ixracına qoyulan məhdudiyyətlərə son qoyulması, xaricdə dondurulmuş aktivlərin sərbəst buraxılması, nüvə materiallarının ölkə daxilində saxlanması və mövcud hərbi qarşıdurmanın, eləcə də, müharibənin sona çatdırılması daxildir.

Ermənistanın Baş naziri Nikol Paşinyan Fransaya işgüzar səfərə gedib.

“Qafqazinfo” xəbər verir ki, bu barədə Ermənistan hökumətinin mətbuat xidməti məlumat yayıb.

Bildirilib ki, səfər çərçivəsində Baş nazirin 10 noyabr tarixində keçiriləcək 9-cu Paris Sülh Forumunda iştirakı nəzərdə tutulub.

Dünyanın ən böyük çip istehsalçısı “Nvidia” şirkətinin həmtəsisçisi və baş direktoru Jensen Huanq şəxsi həyatı ilə bağlı gözlənilməz etiraf edib. 63 yaşlı milyarder işçilərinə göndərdiyi daxili mesajda 1985-ci ildən bəri evli olduğu həyat yoldaşı Lori Huanqa xəyanət etdiyini açıqlayıb.

“Qafqazinfo” xəbər verir ki, ailəsindən və işçi heyətindən üzr istəyən texnologiya maqnatı mesajında məsuliyyəti tamamilə öz üzərinə götürdüyünü bildirib.

“Mən həyat yoldaşıma xəyanət etdim. Hərəkətlərim həyat yoldaşıma və uşaqlarıma zərər verdi. Etdiyim hərəkət üçün heç bir bəraət yoxdur, dərindən təəssüflənirəm və üzr istəyirəm”, - o qeyd edib.

“Forbes” jurnalının 8 noyabr 2026-cı il tarixinə olan qiymətləndirməsinə əsasən, Jensen Huanqın şəxsi sərvəti 162,2 milyard dollar təşkil edir. Mümkün boşanma zamanı sərvətin yarıya bölünməsi fərziyyəsinə əsasən, bu məbləğ 81,1 milyard dollar olaraq hesablanır. Hadisə baş verəcəyi təqdirdə, bu, dünya tarixində ən bahalı boşanma anlaşmalarından biri kimi qeydə alına bilər.

Lakin cütlüyün rəsmən boşanma prosesinə başladığına dair hələlik heç bir hüquqi məlumat yoxdur və Lori Huanq tərəfindən rəsmi bəyanat verilməyib.

Qeyd edək ki, gözlənilməz etiraf fonunda ABŞ mətbuatında Huanqın xarici kəşfiyyat fəaliyyətlərinin hədəfi ola biləcəyinə dair iddialar da yayılıb. “Nvidia” rəhbərliyi məsələ ilə bağlı dərhal müstəqil istintaq başladıldığını açıqlayıb. Şirkətin yaydığı rəsmi məlumatda ABŞ-nin milli təhlükəsizliyinin və ya “Nvidia”nın ticarət sirlərinin pozulmasına dair hər hansı dəlilin tapılmadığı qeyd olunub. Jensen Huanqın istintaq müddətində baş direktor vəzifəsini icra etməyə davam edəcəyi bildirilir.

Birləşmiş Ştatlar İrandan gələn təhlükə siqnallarından sonra Böyük Britaniyadakı Kral Hərbi Hava Qüvvələrinə məxsus bazada yerləşən tanker təyyarələrini təcili şəkildə Almaniyaya və digər müttəfiq ölkələrə köçürüb.

“Qafqazinfo” xəbər verir ki, bu barədə “The Wall Street Journal” (WSJ) qəzeti məsələyə yaxın mənbələrə istinadən məlumat yayıb.

Bildirilib ki, ABŞ hərbi rəhbərliyi İrandan gələn mümkün təhdidlərə qarşı təhlükəsizlik tədbirlərini artırıb. Bu çərçivədə Britaniyadakı strateji bazada saxlanılan tanker təyyarələrinin başqa ölkələrə rotasiyası həyata keçirilib.

Lakin mənbələr təhdidin xarakteri, onun qəfil və ya ümumi təhlükəsizlik riski ilə bağlı olub-olmaması barədə detallı məlumat verməyiblər.

ABŞ Hərbi Hava Qüvvələrinin sözçüsü WSJ-yə verdiyi açıqlamada konkret hərbi əməliyyatlar və ya təhdid detalları haqqında məlumat verə bilməyəcəyini bildirib. Bununla belə, rəsmi şəxs ABŞ hərbi təyyarələrinin əməliyyat ehtiyacları və təhlükəsizlik mülahizələri səbəbindən müxtəlif bazalar arasında tez-tez dislokasiya olunduğunu vurğulayıb.