“Müntəzəm yuxu çatışmazlığı immun sistemini ciddi şəkildə zəiflədir. Bu səbəbdən kifayət qədər istirahət etmək və sağlam həyat tərzi sürmək orqanizmin müqavimətini dərmanlarla tez bir zamanda artırmağa çalışmaqdan daha faydalıdır”.

“Qafqazinfo” xəbər verir ki, bu sözləri kardioloq Gülnarə Orlova müsahibəsində bildirib.

Həkim qeyd edib ki, yetkin insanın gündə 7-9 saat yuxuya ehtiyacı var. Hər gün eyni vaxtda yatıb-oyanmaq vacibdir. Həftəsonu yuxusuzluğu kompensasiya etmək mümkün deyil, rejim tədricən tənzimlənməlidir.

G.Orlova təhlillərlə təsdiqlənmiş vitamin çatışmazlığı olmadan əlavə vitamin qəbul etməməyə çağırıb. O bildirib ki, insan vitaminlərin çoxunu qidadan alır, əlavələrin nəzarətsiz istifadəsi isə viruslara qarşı qoruyucu maneə yaratmır, əksinə, orqanizmə zərər verə bilər.

Kardioloq soyuq havanın oturaq həyat tərzi üçün bəhanə olmamalı olduğunu vurğulayıb. Onun sözlərinə görə, təmiz havada gəzintilərdən başlayaraq tədricən fiziki aktivliyi artırmaq lazımdır.

Mütəxəssis virusların aktiv yayılması başlamazdan əvvəl erkən qrip peyvəndi vurdurmağı tövsiyə edib. O xatırladıb ki, sarımsaq, zəncəfil və limon infeksiyanın qarşısını almır, antibiotiklər isə viruslara deyil, yalnız bakteriyalara təsir edir. Həkim həmçinin əllərin tez-tez yuyulmasının və otaqların müntəzəm havalandırılmasının vacibliyini qeyd edib.

Fövqəladə Hallar Nazirliyinin (FHN) Dövlət Yanğından Mühafizə Xidməti Zaqatala şəhərində yerləşən Zaqatala Rayon Mərkəzi Xəstəxanasında “Səhiyyə müəssisələrində mümkün yanğınlar zamanı yanğın-xilasetmə əməliyyatının təşkili” mövzusunda yanğın-taktiki təlim keçirib.

“Qafqazinfo” xəbər verir ki, təlimin keçirilməsində əsas məqsəd səhiyyə müəssisələrində mümkün yanğınlar zamanı yanğından mühafizə bölmələrinin fəaliyyətinin daha da təkmilləşdirilməsi olub.

Təlim zamanı şərti yanğınla əlaqədar “həyəcan” siqnalı verildikdən sonra Dövlət Yanğından Mühafizə Xidmətinin yanğından mühafizə bölmələri operativ qaydada “hadisə yerinə” çataraq, “yanğınla” mübarizə tədbirlərinə başlayıblar. Şərti yanğın baş vermiş səhiyyə müəssisəsində təxliyə planına uyğun olaraq vətəndaşların təhlükəsiz yerə təxliyəsi həyata keçirilib, şərti xəsarət almış şəxslərə “ilkin yardım göstərilib” və “yanğın qısa müddətdə söndürülüb”.

Uğurla keçən təlimdən sonra əldə edilmiş nəticələr müzakirə olunub, müvafiq tapşırıqlar verilib.

“Avropa İttifaqı öz ölkələrini Rusiya ilə münaqişəyə sövq edir. Avropa qoşunlarının Ukrayna ərazisinə yeridilməsi Moskva ilə müharibənin başlanması demək olacaq”.

“Qafqazinfo” “Kommersant”a istinadən xəbər verir ki, bunu Rusiya Prezidenti Vladimir Putin Nyu-Dehlidə keçirilən BRICS sammiti çərçivəsində jurnalistlərə açıqlamasında bildirib.

“Hazırda onlar (Avropa ölkələri – red.) Ukrayna ərazisinə qoşun yeritmək barədə düşündüklərini deyirlər. Bu, Rusiya ilə müharibə deməkdir”, - deyə V.Putin söyləyib.

Onun sözlərinə görə, bununla belə, Rusiya Avropa ölkələrini təhdid etmir, münaqişənin başlaması üçün də əsas yoxdur.

Kənd Təsərrüfatı Nazirliyi yanında Aqrar Xidmətlər Agentliyində yeni təyinat olub.

“Qafqazinfo” xəbər verir ki, kənd təsərrüfatı naziri Məcnun Məmmədovun Əmri ilə Fuad Məmmədov Agentlik sədrinin müavini vəzifəsinə təyin olunub.

Qeyd edək ki, F.Məmmədov 2010-2014-cü illərdə “Azersun Holding”də müxtəlif istehsalat müəssisələrində Proseslərə Nəzarət üzrə mühəndis və baş mühəndis vəzifələrində çalışıb. 2014-2017-ci illərdə “Azersun Holding”də Süd istehsalı üzrə menecer, 2017-2024-cü illərdə Süd zavodunun direktoru vəzifəsində fəaliyyət göstərib.

2024-cü ilin oktyabrından 2026-cı ilin iyun ayınadək “Azersun Holding”in Süd Məhsulları Biznes Sahəsinin direktoru vəzifəsində çalışıb.

Azərbaycan Respublikasının iqtisadi inkişafına verdiyi töhfəyə və sahibkarlıq sahəsində səmərəli fəaliyyətinə görə Prezidentin müvafiq Sərəncamına əsasən “Tərəqqi” medalı ilə təltif edilib.

Xatırladaq ki, bundan öncə nazir M.Məmmədov Ramil Əzməmmədov və Ayaz Museyibovu özünə müşavir təyin etmişdi.

Fərid Rauf oğlu Şəfiyev Beynəlxalq Münasibətlərin Təhlili və Multikulturalizm Mərkəzi İdarə Heyətinin sədri təyin edilib.

“Qafqazinfo” xəbər verir ki, Prezident İlham Əliyev bununla bağlı Sərəncam imzalayıb.

Qeyd edək ki, Beynəlxalq Münasibətlərin Təhlili və Multikulturalizm Mərkəzi 2026-cı ildə “Beynəlxalq Münasibətlərin Təhlili Mərkəzi” ilə Bakı Beynəlxalq Multikulturalizm Mərkəzinin yenidən təşkili əsasında yaradılıb. Mərkəz beynəlxalq və regional proseslərin, təhlükəsizlik məsələlərinin, eləcə də multikulturalizm sahəsində elmi-analitik araşdırmaların aparılması ilə məşğul olacaq.

Mərkəzin hazırkı adı və yeni hüquqi statusu 2026-cı ilin iyulunda təsdiqlənib.

Paytaxtın bir sıra yollarında tıxac müşahidə olunur.

“Qafqazinfo” xəbər verir ki, bu barədə Nəqliyyatı İntellektual İdarəetmə Mərkəzi (NİİM) məlumat yayıb.

Hal-hazırda yollardakı vəziyyət:

1. Bakı-Sumqayıt şosesi, “20 Yanvar” metro stansiyası istiqamətində;

2. Alı Mustafayev küçəsi, Ziya Bünyadov prospekti istiqamətində;

3. Ziya Bünyadov prospekti, Bakı Olimpiya Stadionunun qarşısından “20 Yanvar” metro stansiyası istiqamətində;

4. Yusif Səfərov küçəsi, mərkəz istiqamətində;

5. Üzeyir Hacıbəyli küçəsi, Azadlıq prospekti ilə kəsişməyə qədər;

6. 8 Noyabr prospekti, Süleyman Əhmədov küçəsi ilə kəsişmədən mərkəz istiqamətində;

7. Tbilisi prospekti, “20 Yanvar” metro stansiyasından mərkəz istiqamətində;

8. Binəqədi şosesi, “Azadlıq prospekti” metro stansiyası istiqamətində;

9. 1-ci Göl kənarı yolu, Ziya Bünyadov prospekti istiqamətində;

10. Ziya Bünyadov prospekti, Müzəffər Nərimanov küçəsi ilə kəsişmədən “20 Yanvar” metro stansiyası istiqamətində;

11. Sabunçu-Zabrat şosesi, “Koroğlu” metro stansiyası istiqamətində;

12. Rəşid Behbudov küçəsi, Mərkəzi Bank istiqamətində sıxlıq müşahidə olunur.

“Demokratlar hakimiyyətə gəlsə, hər şeyi məhv edəcəklər”.

“Qafqazinfo” xəbər verir ki, bu sözləri ABŞ Prezidenti Donald Tramp Dallasda keçirilən Respublikaçılar Partiyasının qurultayında çıxış edərkən deyib.

Ağ Ev rəhbəri bildirib ki, demokratlar hakimiyyətə gələrsə, indiyədək qurulan hər şeyi darmadağın edəcəklər.

Tramp, həmçinin tərəfdarlarını Konqresə keçiriləcək aralıq seçkilərdə şəxsən onun özü namizədmiş kimi fəal səs verməyə çağırıb.