"2020-ci ildən, yəni İkinci Qarabağ müharibəsindən sonra Azərbaycan Cənubi Qafqazda yeni reallıqların yaranmasına imza atdı. Əldə olunan möhtəşəm Zəfər vasitəsilə ölkəmiz Birləşmiş Millətlər Təşkilatının beynəlxalq platformalardakı çoxillik fəaliyyətini nümayiş etdirərək qəbul olunmuş məlum dörd qətnamənin icrasını təmin etdi. Beləliklə, həm regionda, həm də dünya siyasətində tamamilə yeni bir ab-hava yaratmağa nail oldu".

Bu sözləri Oxu.Az-a açıqlamasında Milli Məclisin deputatı Məzahir Əfəndiyev deyib.

O bildirib ki, Azərbaycan xalqı böyük qürur və fəxarət hissi ilə öz doğma torpaqlarına qayıdır:

"Keçdiyimiz günlərdə, Böyük Qayıdış Dövlət Proqramının növbəti mərhələsi çərçivəsində Prezident İlham Əliyevin Cəbrayıl və Zəngilan sakinləri ilə görüşü, onlara evlərinin açarlarını şəxsən təhvil verməsi, bir sıra infrastruktur layihələrinin açılışlarında iştirak etməsi bir daha onu göstərdi ki, işğaldan azad olunmuş torpaqlarımızda yenidənqurma və tikinti işləri daim diqqət mərkəzindədir. Eyni zamanda, Azərbaycanın Qarabağ və Şərqi Zəngəzurda sülhün, əmin-amanlığın təmin olunmasında qətiyyətini nümayiş etdirdi.

Öz doğma yurdlarına qayıdan sakinlərlə görüş zamanı ölkə başçısının toxunduğu məqamlar bir daha göstərdi ki, Azərbaycan yalnız döyüş meydanında deyil, siyasi və diplomatik müstəvidə də tarixi Zəfər əldə edib. Prezident İlham Əliyev çıxışında xüsusi vurğuladı ki, illərlə ATƏT-in Minsk qrupuna həmsədrlik edən ölkələr münaqişənin həllinə deyil, işğalın davam etməsinə xidmət edən siyasət yürüdürdülər. BMT Təhlükəsizlik Şurasının daimi üzvləri olan həmin dövlətlər həm Birinci Qarabağ müharibəsindən sonra, həm də Vətən müharibəsi zamanı Azərbaycana ciddi təzyiqlər göstərməyə çalışsalar da, qədirbilən xalqımızın birliyi və ölkə rəhbərliyi tərəfindən aparılan ardıcıl siyasət nəticəsində bu planlar baş tutmadı".

"Bu gün regionda yaranmış yeni reallığın müəllifi məhz Azərbaycandır. Azərbaycan öz suverenliyini tam bərpa edib və bölgədə dayanıqlı sülhün əsas təşəbbüskarı kimi çıxış edir. Artıq regionda marağı olan bütün tərəflər anlayırlar ki, Azərbaycanın iradəsi nəzərə alınmadan Cənubi Qafqazda heç bir layihə və ya sülh prosesi mümkün deyil.

Lakin bəzi dövlətlərin, xüsusilə də Fransanın müxtəlif vasitələrlə Azərbaycanı ittiham etməsi, bu məsələlərdə artıq başqa maraqların ortaya çıxması siyasi riyakarlıq, habelə Azərbaycan-Fransa münasibətlərinə qarşı hörmətsizlikdir. Fransa liderinin Ermənistanda səsləndirdiyi "həmişə sizə dəstək verməyə hazırıq" bəyanatı isə bir daha göstərir ki, bəzi dairələr hələ də regionda köhnə yanaşmalarını davam etdirməyə çalışırlar. Halbuki 44 günlük müharibə dövründə də Ermənistana müxtəlif formalarda dəstək göstərmək cəhdləri olmuşdu, lakin bu cəhdlərin heç biri Azərbaycanın qətiyyətinin qarşısında nəticə vermədi", - deputat vurğulayıb.

O, həmçinin qeyd edib ki, bu gün Ermənistan sərhədində yerləşdirilən müxtəlif "müşahidə missiyaları" da reallıqda bölgədə vəziyyətə təsir edə biləcək gücə malik deyillər:

"Azərbaycan isə bütün ikitərəfli və çoxtərəfli görüşlərdə dəfələrlə bəyan edib ki, Ermənistana qarşı hərbi planı yoxdur və bölgədə sabitliyin tərəfdarıdır. Bu gün Ermənistanda daxili siyasi proseslərdə də əsas müzakirə mövzularından biri Azərbaycandır. Cənubi Qafqazın bir subyekti kimi Ermənistan xalqı anlamalıdır ki, sülhə, əmin-amanlığa, davamlı inkişafa və yüksək rifaha gedən yol Azərbaycanın yaratdığı yeni reallıqların qəbulundan, eləcə də iki ölkə arasında normallaşma və sülh prosesinə hörmətlə yanaşmadan keçir".