Mən, polkovnik Əkbərov Nicat Zakir oğlu 25.06.1974-cü il tarixində Lənkəran rayonunun Cil kəndində anadan olmuşam. Lənkəran rayon Cil kənd orta məktəbinin 7-ci sinfini bitirəndən sonra Cəmşid Naxçıvanski adına hərbi liseyə daxil olmuşam. 1992-ci ildə oranı bitirdikdən sonra Bakı Ali Hərbi Dənizçilik məktəbinə daxil olmuşam. 1996-cı ildə orada təhsilini başa vurduqdan sonra "leytenant" hərbi rütbəsi alaraq döyüş bölgəsində yerləşən hərbi hissələrin birində taqım komandiri kimi xidmətə başlamışam. 1999-cu ildən Xüsusi Təyinatlı Qüvvələr yaranan vaxtdan orada xidmətdə başlamışam. Xüsusi Təyinatlı Qüvvələrin tabeliyində olan Xüsusi Əməliyyat Briqadalarında, sonradan isə Xüsusi Təyinatlı Qüvvələrin qərargahında müxtəlif vəzifələrdə xidmət etmişəm. Xidmət etdiyim müddət ərzində və 44 günlük Vətən Müharibəsində göstərdiyim xidmətlərə görə 17 müxtəlif adda medallarla təltif olunmuşam. 2023-cü ildə müharibədə aldığım xəsarətlə bağlı səhhətimdə yaranmış problemlərlə əlaqədar ordu sıralarından ehtiyata buraxılmışam.

Baş gizir Şərafəddin Xankişiyevi 2003-cü ildən tanıyıram. O, Xüsusi Təyinatlı Qüvvələrin kursunu həmin il müvəffəqiyyətlə bitirdikdən sonra xüsusi əməliyyat qrupuna müvafiq vəzifəyə təyin olunmuşdur. Xidməti dövründə həmişə hərbi yoldaşlarından seçilən Şərafəddin Xankişiyev qarşısına qoyulan tapşırıqları yüksək peşəkarlıqla yerinə yetirib. O, şərq döyüş idman növlərinə yiyələnərək şəxsi heyətin də idman hazırlığının yüksəlməsində həmişə yaxından iştirak etmişdir. O, 2012-2016-cı illərdə bütün döyüş tapşırıqlarında şəxsən yüksək fəallıq nümayiş etdirmişdir. İştirak etdiyi döyüş tapşırıqları həmişə uğurla yerinə yetirilmiş və bu tapşırıqların icrası zamanı düşmənə saysız-hesabsız itkilər verdirərək geri çəkilməyə məcbur etmişdir.

44 günlük Vətən müharibəsində də baş gizir Şərəfəddin Xankişiyevin misilsiz qəhrəmanlıqları olmuşdur. Həmişə döyüşün mərkəzində olmuş və torpaqlarımızın azad olunmasında sözün əsl mənasında böyük pay sahibi olmuşdur.

O müharibədən sonra 2021-ci ildə dövlət sərhədlərinin bərpasında tam 60 gün yaxından iştirak etmiş və torpaqlarımızdan erməni işğalçılarını geri oturtmağa nail olmuşdur.2022-ci ildə “Sarsıdıcı zərbə” döyüş əməliyyatları zamanı düşmənin 10 milyon dollar dəyərində Radioelektron Mübarizə (RİTEK) kəşfiyyat qurğusu, 3 ədəd silah-sursatla dolu Ural avtomobilini və çoxlu sayda canlı qüvvəsini sıradan çıxartmışdır. Bütün bunlar həm erməni tərəfindən, həm də bizim MN tərəfindən təsdiqlənib mətbuat tərəfindən elan olunmuşdur.

Baş gizir Şərəfəddin Xankişiyevin göstərdiyi şücaət və qəhrəmanlıqlarını saymaqla bitməz.

2023-cü ildə baş gizir Ş. Xankişiyev öz yüksək peşəkarlığını ortaya qoyaraq ermənilərin 10 gizli postlarını bir həftə ərzində aşkar edərək koordinatları dəqiqliklə bizim bölmələrimizə ötürmüşdür. Antiterror əməliyyatları zamanı bu gizli postlar bizim bölmələrimiz tərəfindən məhv edilmişdir. Antiterror əməliyyatları zamanı baş gizir Ş. Xankişiyev şəxsən özü düşmənin bir postunu TƏYİR vasitəsi ilə məhv etmişdir.

Şərafəddin Xankişiyev əsl vətənpərvər oğullarımızdan biridir. O 2012-ci ildən 2023-cü ilə qədər Xüsusi Təyinatlı Qüvvələrin əməliyyat qruplarının tərkibində dəfələrlə döyüş əməliyyatlarında iştirak etmiş, düşməni saysız-hesabsız itkilərə məruz qoymuşdur.

Milli Qəhrəman Pəncəli Teymurovun yaxın silahdaşı Şərafəddin Xankişiyev 2022-ci ildə düşmənə məxsus, dəyəri milyonlarla ölçülən Radio Elektron Mübarizə kompleksini şəxsən sıradan çıxartmışdır.

Onun Vətən qarşısında göstərdiyi qəhrəmanlıqları saymaqla bitməz. Xalq öz əsl qəhrəmanlarını tanımalıdır. Mən bir yüksək rütbəli zabit olaraq onunla hər zaman fəxr etmişəm və inanıram ki, Dövlət başçımız tərəfindən ona layiq olduğu ad - “Milli Qəhrəman” fəxri adı veriləcəkdir.

Azərbaycanın qəhrəman oğulları – Xüsusi Təyinatlı Qüvvələrin igid döyüşçüləri polkovnik Nicat Əkbərov və baş gizir Şərafəddin Xankişiyevin qəhrəmanlıq obrazları

Bu torpaq min illərdir igid oğullar yetişdirib. Tarixin hər dönəmində Vətən dara düşəndə onun harayına çatan mərd kişilər olub. O kişilər ki, torpağın nəfəsini duyub, bayrağın müqəddəsliyini canlarından üstün tutublar. Azərbaycan xalqının qəhrəmanlıq salnaməsi məhz belə oğulların qanı, qeyrəti və şərəfi ilə yazılıb.

Bu gün Azərbaycan Ordusunun gücündən, qüdrətindən danışarkən göz önünə ilk gələnlərdən biri Xüsusi Təyinatlı Qüvvələrin igid döyüşçüləridir. Çünki onların adı qorxmazlıq, peşəkarlıq və sonsuz Vətən sevgisi ilə yanaşı çəkilir. Xüsusi Təyinatlı Qüvvələr sadəcə hərbi birlik deyil, bu xalqın iradəsinin, döyüş ruhunun və milli qürurunun simvoludur.

Azərbaycanın qəhrəman oğulları sırasında xüsusi ehtiramla anılan igidlərdən biri də polkovnik Nicat Əkbərov və baş gizir Şərafəddin Xankişiyevdir. Onların həyat yolu Vətənə xidmətin, hərbi şərəfin və kişi qeyrətinin canlı nümunəsidir.

“Salam, torpaq kişilər!” – bu ifadə təsadüfi deyil. Çünki Nicat Əkbərov və Şərafəddin Xankişiyev məhz torpağın kişiləridir. Onlar Vətənin daşına, qayasına, müqəddəs sərhədlərinə canıyla bağlanan insanlardır. Belə kişilər torpaqdan güc alır, torpağa güc verir.

Azərbaycan xalqı 44 günlük Vətən müharibəsində öz qəhrəman oğullarının necə böyük şücaət göstərdiyini bütün dünyaya nümayiş etdirdi. O günlərdə səngərlərdə ölümün gözünə dik baxan, ən çətin əməliyyatlara sinə gərən məhz XTQ-nin igid döyüşçüləri idi. Dağları aşan, keçilməz yolları keçən, düşmənin illərlə qurduğu istehkamları yarıb keçən qəhrəmanlar Azərbaycan əsgərinin sarsılmaz ruhunu ortaya qoydu.

Polkovnik Nicat Əkbərov kimi peşəkar hərbçilər həmin qəhrəmanlıq tarixinin əsas simalarındandır. Onun xidmət yolu sadəcə hərbi karyera deyil, həm də Vətənə sədaqətin örnəyidir. Hərbi intizamı, döyüş hazırlığı, əsgərlərinə olan diqqəti və komandir məsuliyyəti onu hər zaman fərqləndirib.

Nicat Əkbərovun simasında Azərbaycan zabitinin ən ali keyfiyyətləri birləşir – cəsarət, qətiyyət, vətənpərvərlik və mənəvi bütövlük. O, döyüşçülərinə sadəcə əmr verən komandir deyil, ön sırada dayanan, əsgərinin taleyini öz taleyi bilən qəhrəman zabitdir.

Baş gizir Şərafəddin Xankişiyev isə Azərbaycan əsgərinin iradəsini və qorxmazlığını özündə yaşadan igidlərdəndir. XTQ-də xidmət etmək hər adamın bacardığı iş deyil. Bu yol böyük fiziki hazırlıqla yanaşı, dəmir iradə və sonsuz Vətən sevgisi tələb edir. Şərafəddin Xankişiyev məhz bu keyfiyyətləri ilə seçilən qəhrəman hərbçilərdəndir.

Onların adı çəkiləndə bir xalqın qüruru dilə gəlir. Çünki bu kişilər Azərbaycanın təhlükəsizliyi, dövlətçiliyi və torpaq bütövlüyü uğrunda canlarını ortaya qoyan insanlardır.

Vətən sevgisi kitablarda yazılan söz deyil. Əsl Vətən sevgisi döyüş meydanında sübut olunur. Yağış altında, qar altında, səngərdə, düşmənlə üz-üzə dayananda insanın kim olduğu bəlli olur. Nicat Əkbərov və Şərafəddin Xankişiyev kimi qəhrəmanlar məhz o ağır sınaqlardan alnıaçıq çıxmış igidlərdir.

Bu gün Azərbaycan gəncliyi onların həyat yolundan örnək götürür. Çünki belə qəhrəmanlar yalnız döyüş meydanında deyil, mənəvi dəyərləri ilə də cəmiyyətə nümunədirlər. Onlar sübut etdilər ki, Vətən uğrunda yaşamaq da, lazım gələrsə can vermək də böyük şərəfdir.

Azərbaycan xalqı hər zaman qəhrəman oğullarına böyük sevgi ilə yanaşıb. Çünki xalq yaxşı bilir ki, rahat yaşadığımız bu torpaqların keşiyində məhz belə igidlər dayanır. Sərhəddə ayıq-sayıq duran, gecəsini-gündüzünə qatan, hər an ölümə hazır olan kişilər Vətənin əsl sipərləridir.

Bu gün dünya Azərbaycan Ordusunun gücünü qəbul edirsə, bu gücün arxasında XTQ döyüşçülərinin qəhrəmanlığı dayanır. Onların keçdiyi döyüş yolu artıq hərb tariximizin şərəf salnaməsinə çevrilib.

Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu tarixi Zəfərə imza atdı. Bu Zəfərin əldə olunmasında Nicat Əkbərov və Şərafəddin Xankişiyev kimi qəhrəmanların xüsusi payı var. Çünki torpaq yalnız onu sevən oğulların gücü ilə qorunur.

Bu qəhrəmanların həyatında diqqət çəkən başqa bir məqam isə sadəlik və mənəvi zənginlikdir. Əsl qəhrəman heç zaman özünü reklam etməz. Əsl kişi gördüyü işi Vətən borcu bilər. Nicat Əkbərov və Şərafəddin Xankişiyev də məhz belə insanlardandır.

Onların baxışlarında bir Vətən dayanır. Danışıqlarında torpaq sevgisi duyulur. Çünki onlar Azərbaycanı sadəcə xəritədə görünən ölkə kimi deyil, namus və şərəf məsələsi kimi qəbul edirlər.

Bu gün şəhid ailələrinin, qazilərin yanında olmaq, onların dərdini bölüşmək də əsl vətəndaşlıq nümunəsidir. XTQ igidləri hər zaman şəhid ailələrinə xüsusi ehtiramla yanaşıblar. Çünki onlar yaxşı bilirlər – Vətən uğrunda canından keçənlərin ailələri xalqın baş tacıdır.

Azərbaycan xalqının yaddaşı qəhrəman oğullarını heç zaman unutmayacaq. Bu torpaq öz igidlərini qoruyur, yaşadır və gələcək nəsillərə örnək göstərir.

Nicat Əkbərov və Şərafəddin Xankişiyev kimi kişilər haqqında danışmaq əslində Vətənin gücündən danışmaqdır. Onların timsalında Azərbaycan əsgərinin ruhu görünür – sınmayan, əyilməyən, qorxmayan ruh.

Bu gün Azərbaycan bayrağı Qarabağda qürurla dalğalanırsa, bu bayrağın kölgəsində belə igidlərin əməyi, qanı və alın təri dayanır. Onlar tarix yazan qəhrəmanlardır.

“Salam, torpaq kişilər!” – bu salam Azərbaycanın mərd oğullarına, Vətən uğrunda sinəsini sipər edən qəhrəmanlara ünvanlanan ən böyük ehtiramdır.

Torpaq Sizi tanıyır.

Bayraq Sizi tanıyır.

Bu xalq Sizi tanıyır.

Azərbaycan var olduqca Nicat Əkbərov və Şərafəddin Xankişiyev kimi qəhrəman oğulların adı daim hörmətlə çəkiləcək. Çünki Vətəni yaşadan da, qoruyan da məhz belə torpaq kişiləridir.

Hürü Hacızadə

Yazıçı-publisist

“Qızıl qələm” mükafatçısı

Fərid Faiq oğlu Səfərov

AJB-nin üzvü

Azərbaycan Vətən Müharibəsi Veteranları İB-nin fəxri üzvü və komandamız heyəti